"ကျန်းမာဖို့"
ရုပ်ပိုင်းဆိုင်ရာဖွဲ့စည်းမှုနဲ့ စိတ်ပိုင်းဆိုင်ရာခံစားမှုများဟာ အသက်အရွယ်နဲ့အတူ ပြောင်းလဲလာပါတယ်။ အသက် ၄၀ ဝန်းကျင်လောက်ဆိုရင်ကို သွေးတိုး,စ တတ်လာပြီ၊ ခါးမျက်တတ်လာပြီ၊ အာရုံကြောအားနည်းလာပါပြီ… ဒါက ကိုယ်ခံအား၊ လုပ်ဆောင်နိုင်စွမ်းတွေ အားလျော့လာတဲ့ လက္ခဏာပါ။ ဒီလိုပဲ ဒေါသထွက်လွယ်လာတာမျိုး၊ အထီးကျန်သလို ခံစားရတာမျိုးတွေလည်း ရှိတတ်ပါတယ်။
ဒါကြောင့် စိတ်ပျိုကိုယ်နု အင်အားတိုးစေမယ့် နည်းလမ်းလေးတွေကို ပြောပြပေးချင်ပါတယ်။
ဆောင်ရန်များ
(၁) ကိုယ်ကာယလေ့ကျင့်ခန်း ပုံမှန်လုပ်ပါ။ (လမ်းလျှောက်ခြင်းက သွေးလည်ပတ်မှု၊ အဆုတ်၊ နှလုံးနှင့် အရိုးအကြောတို့အတွက် အကောင်းဆုံးလေ့ကျင့်ခန်းပဲဖြစ်ပါတယ်။)
(၂) ကိုယ်ခန္ဓာတွင်းမှ အပူအပုပ်များကင်းစင်ပြီး အူသန့်ရှင်းရေးအတွက် ရေကို များများသောက်ပေးပါ။ (ဆီးရောဂါမဖြစ်အောင် ရေကိုဝ,ဝသောက်ပါ။)
(၃) ကိုယ်ခံအားကောင်းပြီး ကျန်းမာသန်စွမ်းဖို့ အစာကို မျှတအောင်စားပါ။
(အရိုးကျန်းမာရေးအတွက် နို့နဲ့ ကွေကာအုပ် စတဲ့ဖြည့်စွက်စာများကို စားသုံးသင့်သလို၊ Protein ဓာတ်အတွက် အသားနှင့် ဥများစားသုံးပေးရပါမယ်။ သားသတ်လွတ်သမားများအတွက်ဆိုရင်တော့ ပဲအမျိုးမျိုး၊ တို့ဟူး၊ ဟင်းနုနွယ်၊ ဂျုံဖြင့်ပြုလုပ်ထားသောအစားအစာများ၊ ထောပတ်သီး၊ ပိန္နဲသီး တို့ကို စားသုံးပေးလို့ရပါတယ်။)
(၄) စိတ်ခွန်အားပြည့်ဖို့ တရားထိုင်ပါ။ ဒါကို ဘယ်ဘာသာမဆို လေ့ကျင့်ခန်းတစ်ခုအဖြစ်လည်း လုပ်လို့ရပါတယ်။
(တရားထိုင်ခြင်းက အာရုံစူးစိုက်မှုကိုပိုမိုအားကောင်းစေပြီး စိတ်ကြည်တယ်၊ ဦးနှောက်ရဲ့ လုပ်ငန်းဆောင်တာများအတွက်လည်း အနားရစေပါတယ်။)
(၅) ပျော်ရွှင်ဖို့အတွက် မိသားစုကို အချိန်ပေးပါ၊ ဂရုစိုက်ပါ။ မိတ်ဆွေ၊ သူငယ်ချင်းများနှင့်လည်း သွားလာတွေ့ဆုံပြီး ရင်ဖွင့်ပါ၊ ကူညီပါ။
(၆) နေ့သစ်တိုင်းမှာ လတ်ဆတ်ပေါ့ပါးဖို့ အိပ်ရေးဝအောင်အိပ်ပါ။
(အသက်အရွယ်ရလာတာနဲ့အမျှ အိပ်မပျော်တာတို့၊ ခဏခဏနိုးတာတို့တွေ ဖြစ်လာတတ်ပါတယ်။ ဒီအတွက် အိပ်ခါနီးမှာ စိတ်ညစ်စရာ၊ ဝမ်းနည်းစရာတွေ မတွေးပါနဲ့။ အိပ်ဆေးသောက်အိပ်တာက ကြာလာရင် ဘေးထွက်ဆိုးကျိုးရှိနိုင်လို့ သဘာဝအတိုင်းအိပ်ပျော်အောင် လေ့ကျင့်ပါ။)
ရှောင်ရန်များ
ဆေးလိပ်၊ ကွမ်းယာ၊ အရက်တို့ကို တတ်နိုင်သမျှရှောင်ကြဉ်ပါ။
အသင့်စား အစားအစာများစားသုံးခြင်းကိုလျော့ချပါ။
ဆီးချိုဖြစ်စေနိုင်သည့် ချိုလွန်းသော အစားအသောက်များ၊ အဆီများကို ရှောင်ပါ။
သွေးတိုးရောဂါဖြစ်စေနိုင်သည့် ငန်လွန်းသော အစားအစာများရှောင်ပါ။
ဆေးမြီးတိုများဖြင့် ကုသခြင်းထက် ထိရောက်သောဆေးကုသမှု ခံယူပါ။
အားလုံးပဲ သက်ရှည်ပျော်ရွှင်ဖို့ ကျန်းမာရေးနဲ့ညီညွတ်သော အစားအသောက်၊ နေထိုင်မှုပုံစံများကို နောက်များမှာ ဗဟုသုတအဖြစ် ဝေမျှပေးသွားပါဦးမယ်။
အာရောဂျံ ပရမံလာဘံ
Written By Hnin_Lae
2 views